“Səttar Mehbalıyev Qarabağ əlilinin başına torba keçirtdirib villasına apartdırmışdı...”

Dünən Azərbaycan Həmkarlar İttifaqları Konfederasiyasının (AHİK) binasının qarşısında özünü yandıran II qrup Qarabağ əlili Zaur Həsənovun qaynı Rüstəm Hüseynov AHİK sədri, deputat Səttar Mehbalıyevin bu gün mətbuata verdiyi açıqlamaya münasibət bildirib.

R.Hüseynov  saytına açıqlamasında dedi ki, Zaur Həsənovun özünü yandırmasına görə birbaşa Səttar Mehbalıyev günahkardır: “İşlətdiyi çayxananın sökülməsi ilə bağlı məhkəmə qərarından sonra Zaur müxtəlif qurumlara müraciət etdi. Bundan sonra Səttar Mehbalıyev obyektin sökülməyəcəyini vəd etdi. Amma sonradan vədini yerinə yetirmədi. Zaurun evi bank tərəfindən satışa çıxarılıb. Ona neçə vaxtdır biz qohumlar kömək edirik. Ancaq evini geri qaytarmaq üçün banka pul ödənilməlidir”.

R.Hüseynov qeyd etdi ki, Zaur Həsənov deputata sonuncu dəfə müraciət edərkən Səttar Mehbalıyev “özünü yandıran deməz, gedib bunu eləyər” deyib. Zaur da Səttar Mehbalıyevin qəbuluna gedərkən uşaqlarını da özü ilə aparıb. Deyirdi ki, bəlkə uşaqlara yazıqları gəldi. Amma Səttar Mehbalıyevin uşaqlara da rəhmi gəlmədi”.

R.Hüseynov iddia etdi ki, Zaur Həsənovun əvvəllər işlətdiyi çayxananın yaxınlığında müxtəlif obyektlər yerləşir və hələ də fəaliyyət göstərir. Onların işləməsi üçün müxtəlif vasitələrlə icazə ala biliblər. Təkcə Zaur Həsənovun ailəsini dolandırdığı çayxana sökülüb.

Zaur Həsənovun həyat yoldaşı isə qəhərdən boğulub danışa bilmədi. O,virtualaz.org saytına yalnız bunları dedi: “Vəziyyəti dünənə nisbətən bu gün pisləşib. O, artıq haqsızlıqdan bezdi”.

Daha sonra Zaur Həsənovun hüquqlarını müdafiə edən Vətən Müharibəsi Əlilləri İctimai Birliyinin sədri Firudun Məmmədovla danışdıq. Hüquq müdafiəçisi virtualaz.org saytına sensasion açıqlama verdi: “Dünən gecədən təxminən 200-ə yaxın Qarabağ əlili Zaurun yatdığı 5 saylı klinikanın qarşısına toplaşmışıq. Biz ölkə rəhbərliyindən bu məsələ ilə bağlı açıqlama gözləyirik. Səttar Mehbalıyev ANS-ə açıqlamasında Zaur Həsənovu “şərçi, şantajçı” adlandırdı. Amma o, Qarabağ əlilinə zülm edib. Bunun fərqində olmalıdır. Bunu mənə Zaur özü danışıb. Zaur deyirdi ki, o, çayxanasının sökülməsinə etiraz edən zaman deputat Səttar Mehbalıyevin adamları gecə saat 12-də həmin çayxanaya gəliblər. Onlar Zaurun başına torba keçirdirək onu deputatın villasına apartdırıb. Gecə saat 12-də Zauru gözü bağlı öz ayağına apartdıran Səttar Mehbalıyev ona şikayətlərini geri götürməyi əmr edib, əks halda daha pis aqibətlə hədələyib. Əgər Zaur şərçidirsə, bunu elə həmin vaxt mətbuata açıqlayardı. Bizim - onun cəbhə yoldaşlarının hamısının deputatın bu torbakeçirmə əməliyyatından xəbərimiz vardı. Sadəcə məsələ həllini tapsın deyə bunu o zaman açıb-ağartmadıq. Dedik bəlkə deputat nə elədiyinin fərqində olar, problem bəlkə sakitcə, anlayışla həll olunar”.

F.Məmmədov dedi ki, məsələ ilə bağlı Milli Məclisin İnsan Haqları Komitəsinin sədri, deputat Rəbiyyət Aslanova ilə də görüşüblər: “Mən də həmin görüşdə iştirak etdim. 60 Qarabağ əlilinin müraciətini Rəbiyyət Aslanovaya verdim. Rəbiyyət xanım da elə bizim yanımızda bu barədə spiker Oqtay Əsədova məlumat verdi. Amma sonrakı müraciətimizdə bizi Rəbiyyət Aslanovanın qəbuluna buraxmadılar. Onun yanındakılar dedilər ki, bizim Səttar Mehbalıyevə gücümüz çatmır. Bu məsələdən Səttar Mehbalıyevin qudası, Prezident Administrasiyası ictimai-siyasi şöbəsinin müdiri Əli Həsənovun da xəbəri var. Əli Həsənova da müraciət ünvanlamışıq, amma nəticəsi olmayıb”.

Qarabağ qazisi daha bir maraqlı fakt açıqladı. Dedi ki, deputat Səttar Mehbalıyevin şəhid olmuş qardaşı da onların, o cümlədən Z.Həsənovun döyüş yoldaşı olub.

Virtualaz.org saytı Zaur Həsənovun hüquqlarını müdafiə edən Vətən Müharibəsi Əlilləri İctimai Birliyinin sədri Firudun Məmmədovun iddiaları ilə bağlı AHİK sədri, deputat Səttar Mehbalıyevin mövqeyini öyrənməyə cəhd edib.

Səttar Mehbalıyevin bizə məlum olan telefonuna cavab verən AHİK katibi Nadir Əliyev virtualaz.org saytına dedi ki, məsələ Firudun Məmmədovun iddia etdiyi kimi deyil və Zaur Həsənova qarşı heç bir təzyiq olmayıb: “Zaur Həsənovun başına torba keçirilməsi və ona təzyiq edilməsi barədə deyilənlər yalandır. Zaur Həsənovla bağlı suallara AHİK mətbuat xidməti daha dəqiq cavab verə bilər”.

AHİK mətbuat xidmətindən isə suallarımıza cavab vermək istəmədilər. Bununla belə qurumun da mövqeyini öyrənib işıqlandırmağa çalışacağıq.

Mənbə: Legion.az >>

Aslan İsmayılov: Səttar Mehbalıyev "Xəyal"ın sahibi Fikrət Rəcəbovun da malını əlindən alıb müflis etdiyindən, o da Zaur həsənov kimi həyatına qəsd etmişdi!

           “Azadlıq”a açıqlamasında belə bir problemlə üzləşdiyini deyən A.Ismayılov hazırda konfederasiyanın Səttar Mehbalıyev tərəfindən ata malı kimi idarə olunduğunu qeyd edir: “Səttar Mehbalıyev telekanallara müsahibəsində də deyib ki, bu məsələ onluq deyil. Bu tamamilə yalandır. Səttar Mehbalıyellə təxminən iki ilə kimi vuruşan biri kimi deyirəm ki, söhbət ancaq onun öz şəxsi marağı ilə bağlıdır. Mənimlə bağlı bütün məhkəmələri Səttar Mehbalıyev Ali məhkəmənin sədri Ramiz Rzayevin köməkliyi ilə uddu. Bibi Heybətdə ev tikirdim, onu dörd tərəfdən mühasirəyə aldı. Onu ifşa edən, qanunsuzluqları sübut edən materialların mətbuat vasitəsilə yaydığıma görə, məni sakitləşdirmək üçün hasarı sökdü, istədiyimdən də artıq həyət verdi. Bu gün mənimlə Səttar Mehbalıyevin problemi mənim xeyrimə həll olunub. Ondan nə xahiş, nə də minnət etmişəm. Məndən aldığı həyətyani sahəmi artıqlaması ilə qaytarıb. Bu gün istəyir getsin o hasarı da evi də söksün. Bunu məni susdurmaq üçün etmişdi, ancaq bu məsələdən sonra tüpürürəm o evə də, həyatyanı sahəyə də”.
          A.Ismayılov Z.Həsənovu yaxından tanıdığını və onun tam haqlı olduğunu da qeyd etdi: “Bu torpaq sahəsi onun idi, həmin sahənin nə Səttar Mehbalıyevə, nə də konfederasiyaya heç bir aidiyyatı yoxdur. Məhkəmə qərarları arxasında gizlənən Səttar Mehbalıyev həmin qərarları qanunsuz olaraq alıb. Onunla problemim olan dövrdə, məhkəmə çəkişmələri zamanı Apelyasiya Məhkəməsi mənim xeyrimə qərar qəbul etdi. Ancaq Ali məhkəmənin sədri Ramiz Rzayev Səttar Mehbalıyevin təkidi ilə Apelyasiya Məhkəməsindən mənə rədd cavabının verilməsini tələb edirdi. Ancaq Apelyasiya Məhkəməsi qanuni qərar çıxardı. Səttar Mehbalıyevlə ortaq olan Ramiz Rzayev həmin qərarı ləğv etdirdi. Qarabağ əlilinin isə öz malını əlindən aldılar, özünü də atdılar bayıra. O gəldi, ona heç bir təmənnasız bir Qarabağ əlili kimi bir neçə dəfə cürbəcür ünvanlara ərizə yazdım. Sonra Səttar onu çağırdı yanına və yazdırdı ki, şikayəti özü yox, Aslan Ismayılov və onun kimiləri ona yazdırıb. Mən də bunu bildim, amma ondan heç bir incikliyim olmadı. Çünki bilirdim ki, bunu zorla ondan alıblar. Həmin ərizəni indi Səttar Mehbalıyevin ortalığa çıxarıb. Ərizəni alandan sonra bir ay işləməyə icazə verdi, sonra da yenə əmlakını əlindən aldı”.

* * *

              A.Ismayılovun sözlərinə görə, vətəndaşların haqqını yeməkdə S.Mehbalıyevin şərikləri onun Prezident Administrasiyasının şöbə müdiri olan qudası Əli Həsənov və dostu olan Ali Məhkəmənin sədri Ramiz Rzayevdir. Bu işlərdə Hacıbala Abutalıbov da onlara kömək edir: “Bibi Heybət camaatı illərdir orda abadlıq işləri aparıb. Bataqlıq olan ərazini çirkabdan təmizləyiblər. Hər biri o torpaqları alıb, ailələrini dolandırmaq üçün obyekt açıblar. Obyektlər işə başlayan kimi Səttar Mehbalıyev gəlib hamısını əllərindən alıb. Orda bircə nəfər var. Onun da yanında dayısı oğlunu oturdub 50 faizlə işlədir. Qalanların nəyi var hamısını əllərindən alıb”.
             Vəkil Azərbaycanda ilk dəfə zorla əmlak əldən almaq tendensiyasını Səttar Mehbalıyevin qoyduğunu deyir. ilk belə hal isə 2000-ci illərin əvvəlində baş verib: “2000-ci ilin əvvəllərində yaxşı tanıdığım ”Xəyal Holdinq"in sahibi, maştağalı rəhmətlik Fikrət Rəcəbov var idi, sonra özünü öldürdü. Həmin o Fikrət Rəcəbovun Zaqulba tərəfdə “Xəyal” restoranı var idi, Bakının bir nömrəli restoranı idi. Səttar Mehbalıyev həmin yeri zorla Fikrətin əlindən aldı. Bunu özünə qəsd etməzdən əvvəl mənə Fikrət demişdi. Qəsd etməyinin də səbəbi məhz belə hallar oldu. Onun əlindən əmlaklarını aldılar. Artıq borca düşəndə canına qəsd etdi. Yəni bu birinci qəsd deyil. Mənim bildiyim, Səttar Mehbalıyevin qəsdə apardığı ikinci adamdır. Əgər prezident bu halların qarşısını almaq istəyirsə Səttar Mehbalıyevi, Əli Həsənovu, Ramiz Rzayevi dərhal vəzifələrindən azad etməlidir. Biz millət olaraq bunu tələb etməliyik. Əgər bunu tələb etməsək, demək yaşamaq haqqımız yoxdur. Çünki həmin o Zaur Həsənov və onun kimilər bizim vətənimizi, namusumuzu qoruyublar. Onlara da münasibət bizim namusumuza, qeyrətimizə, vətənimizə olan münasibətdir".

Mənbə: Azadliq.info >>

Özünü yandıran əlilin oğlunun ürək parçalayan müsahibəsi

Virtualaz.org saytının əməkdaşları dekabrın 25-də Azərbaycan Həmkarlar İttifaqları Konfederasiyasının (AHİK) binasının qarşısında özünü yandıran II qrup Qarabağ əlili Zaur Həsənovun 13 yaşlı oğlu İsmayıl Həsənovla görüşüblər.

Atasının özünü yandırmasının canlı şahidi olan İsmayıl ailəsinin son iki ildə yaşadığı hadisələrlə bağlı virtualaz.org saytına şok faktlar açıqladı.

13 yaşlı İsmayılın dediklərindən:

- Atam hər gün deyidi ki, özümü yandıracam. Amma həmin gün bizə söz verdi. Dedi ki, qorxmayın, özümə heç nə etməyəcəm. Mən, qardaşım və bacım atamla birgə getdik. Balaca bacım isə evdə qaldı. Atam dedi ki, Səttar Mehbalıyevlə görüşəcəm. Oradakı polislər atamı içəri buraxmadılar. Atam da “əgər Səttar Mehbalıyev məni qəbul eləməsə, özümü yandıracam” dedi. Qapıdakı polislər isə dedilər ki, yandıra bilməzsən, yandır görək hələ. Yəni polislər atamı ələ saldılar, onu əsəbiləşdirdilər, qızışdırdılar. Atam da başından aşağı benzin tökdü, yandırdı. Atamın yanmasını Səttar elədi. Yaşayışımız çox pisdir, amma bizi başa düşən yoxdur (gözləri dolur).

- İsmayıl, bəs indi sizə kim baxır?

 - Uşaqlar ana nənəmin yanında qaldılar. Anam atamın yanında qalır. Mən də atamı görməyə gəlmişəm. Onsuz da həmişə onunla qəbullara gedirdim. Atam əsəbiləşirdi deyə tək buraxmırdıq. Biz Əli Həsənovun da qəbulunda olmuşduq.

 - Əli Həsənov sizi qəbul elədi? Nə dedi?

 - Bizi onun yanına buraxmırdılar. Sonra atamla onu izləməyə başladıq. İki gün onu izlədik. Bir gün işə gəlmədi. Səhərisi gün tezdən 9-dan axşam 6-dək gözlədik. İşdən çıxanda yaxınlaşdıq. Atam dedi ki, Səttar Mehbalıyev mənim çayxanamı alıb, dolana bilmirəm. Əli müəllim də dedi ki, bu iş mənlik deyil. Atam ona da dedi ki, özümü yandıracam. Atam deyirdi ki, onlar (Səttar Mehbalıyevlə Əli Həsənov nəzərdə tutulur-red.) qohumdurlar. Sonra atam Prezident Aparatının qarşısında dayanırdı ki, kimsə bizi qəbul eləsin. Amma heç kim qulaq asmırdı. O qədər yerləri gəzdik ki...

 - Bəs məktəbə getmirsən?

 - Yox, bu il cəmi üç dəfə getmişəm. Bank evimizi əlimizdən alıb. 2011-ci ildə prezident İlham Əliyev Lökbatanda əlillərin binasında bizə ev verdi. Atam çayxananı təmir etmək üçün evimizi girov qoyub bankdan pul götürdü. Bank da bizi evimizdən qovdu. Neçə aydır ki, babamgildə qalırıq. Hər şeyimiz də o evimizdə qalıb. Məni məktəbə göndərirdilər, mən də qaçıb işləməyə gedirdim.

 - Harada işləyirdin?

 - “Sədərək” bazarında. Qab satırdım, günə 5-10 manat qazanırdım, evə çörək alırdım. Anam işləmir, evdə 8 nəfər yaşayırıq. Babam fəhlə işləyir. Mən babamın işlədiyini görəndə pis olurdum. Axşam yeməyi az yeyirdim ki, səhər pul olmasa, yeməyimiz qurtarmasın. Atamın ayaqları ağrıyırdı. Bilirsiniz, Səttar atamı nə qədər söyüb, mən onunla gedəndə görmüşəm. Atam əsəbiləşəndə danışa bilmirdi. Xalalarımın, dayılarımın yanında deyirdi ki, özümü yandıracam. Bacılarımın biri 3-cü, o biri də 5-ci sinifdə oxuyur. Bacılarım, qardaşlarım dərsə gedirlər. Ailədə böyük uşaq mənəm. İndi hamı atamdan yazır, baxıram çox pis oluram (yenə kövrəlir). Atamın belə olmasını Səttar elədi. O dəfə atamı basmışdı maşına, aparmışdı.

 - Kim?

 - Səttar.

 - Bunu kim danışıb?

 - Atam, mən və qardaşım evə gedirdik çayxanadan. Məscidin yanında bir maşın saxladı, içindəkilərin üzündə maska vardı. Atamı maşına mindirib apardılar. Biz də çox qorxduq, avtobusa minib evə getdik. Sonra atam gəldi, dedi ki, məni narkotiklə, silahla tutdurmuşdular. Tapança ilə qorxudublar. Atamla kimsə danışırdı telefonda.

 - Bu gün atanla görüşsən, ona nə deyəcəksən?

 - Mən prezidentdən istəyirəm ki, Səttarı cəzalandırsın. Bizim çayxanamız olanda yaxşı dolanırdıq. Evə bazarlıq edirdik, amma sonra yeməyimiz azaldı. Prezident desin onlara ki, atamın çayxanasını versinlər, pensiyasını çoxaltsınlar. Mən məktəbə getmək istəyirəm, oxumaq istəyirəm...